各位讀者好友：
不難發現，＜花與愛麗斯＞好像一下子完全停頓了下來．故事其實並未完結， 只因本人近日抱恙再加上生活上有些突發轉變所致！謹此向各位有追看開的朋友衷心致歉！
本人正加緊文章的修改速度，務求儘快把餘下數章編改好，以愧讀友～～
現在先行預告＜花與愛麗斯＞的餘下章節及少許內容：
- 第四章 風暴－－吵鬧篇STORMING
- 第八回 爭吵QUARREL
- 第九回 遠飛DEPARTURE
- 第十回 相遇ENCOUNTER
在森林中，沒有人可以括免於風暴的吹襲，正如相戀中的情侶，沒有那一對可以完全避過爭吵，甚至風暴的日子！因為我們都是來自不一樣的生活背景，被不一樣的教育而薰陶．．．
樂花（FLORA）與韓峰（BRIAN）的矛盾正式揭幕；而小倆口施麗愛（ALICE）和杜子康（HONG）又有些什麼波折／障疑呢？
- 第五章 結果－－結局篇ENDING
- 第十一回 領悟CONSCIOUSNESS
- 第十二回 夢醒AWAKEN
風暴過後，叢林萬物都得到洗禮，其中尤以百花盛放得更燦爛，有些甚至更能開花結果！
兩個女孩子，不一樣的人生，不一樣的故事，最終是禍是福，不日自有分曉～～
綠悠 匆筆
第七回 遊樂場 PLAYGROUND
背景： 嘉年華會遊樂場
EDMOND：嘩，康哥哥，今年到底吹MUG嘢風，你竟然主動搵我陪你嚟嘉年華會？你唔係話依Ｄ係俾個Ｄ細路仔，細路女嘅無聊節目嚟架咩？
HONG：總之今日有Ｄ特別，你就拜託收吓把口，等陣見到人哋時千祈咪亂o翕呀．．
EDMOND：人哋？邊位呀？一定唔係男人啦．女人，我姑媽，NO，我堂妹，唔係．．咁唔通，女朋友？．．嘩．．你笑喎，死囉，你竟然笑喎！！！死喇．．世界變喇，你竟然都會有女朋友，佢係咪有Ｄ問題架，竟然有咁玉樹臨風嘅我唔揀，揀你依個世紀末蛀書蟲，佢一定有病！喂，你做MUG唔出聲呀？收收埋埋，神神秘秘咁，快Ｄ從實招來喇喎．
HONG：佢係咪有病你等陣咪知囉．．依，等等〔手提電話〕喂．．唔．．我地依家响入口左邊個度等緊你．．哦，唔緊要啦，你地慢慢行啦，等陣見．．
ALICE：唔．．等陣見．．
JESSIE：喂，你打電話俾邊個呀，今日唔係得我同你咋咩？
ALICE：唔係，仲有兩個．．朋友囉．．
JESSIE：朋友？咁特別？我識唔識架？
ALICE：今日之後咪識囉．．
JESSIE：唔．．星座書話我今日有意外．．驚喜．．你咪嚇我喎．．
ALICE：行多幾步啦．．就快見到架喇．．到時你咪知囉
JESSIE：依，你好少咁神秘架喎．．
ALICE：到喇，到喇．．康．．
HONG：ALICE．．
ALICE：唔好意思呀，遲咗．．
HONG：都係一陣啫．．呀，係，依位係我堂弟ＥDMOND，依位係ALICE同埋佢好朋友JESSIE．．
EDMOND：〔唔咸唔淡普通話〕你姣，阿哨，喎很高先認SIT你
ALICE：係．．你好．．
JESSIE：ALICE，依位係？
ALICE：佢．．佢係我〔小聲〕男．朋友．．阿康
JESSIE：呀．．．噢．．SORRY
HONG：你好，JESSIE，ALICE成日都有提起你架．．
JESSIE：不過，佢呢，重色輕友囉，都無同我提起過你！
EDMOND：依位小姐，你咁講就唔啱喇噃，你又唔係ALICE小姐嘅令壽堂，佢都唔駛吓吓都同你報告啫，吓嘩？
JESSIE：喂，你依個呀邊個邊個，我地講嘢幾時到你插咀呀？
EDMOND：你依位呀邊位邊位，你講嘢呀？
HONG：好喇，好喇，你地又邊個又邊位咁，不如停戰先，入場啦，好嘛？
EDMOND：好，大哥叫到，小弟萬死不辭．．
JESSIE：哼．．咁你仲唔去‘市’．．
ALICE：JESSIE．．
ALICE：嘩，好熱鬧呀．．周圍都好多人呀．．
JESSIE：係囉．．真係好鬼死似年宵花市囉．．
EDMOND：唔同．．依度今年多咗Ｄ嘢．．
HONG：哦．．係？
EDMOND：就係我地嘅美女ALICE同．．野獸囉．．仲係多咀個隻．．哈哈
JESSIE：蝦，你．．哼，好過你係唐僧．．嘅徒弟豬八戒呀！
HONG：喂，你兩個呀，嗌咗咁耐，你哋把口唔勊，我同ALICE隻耳仔都悶啦！依家呢，我同ALICE就準備上去坐摩天輪喇，你地不如一齊？
EDMOND：嘩，要我同依隻多咀獸坐摩天輪，分分鍾摩天輪變飛天輪呀，咪攪
JESSIE：哼，鬼希罕同依Ｄ豬八戒一齊呀，咁即係‘困獸鬥’，真係閘住！我寧願去個邊Ｄ地攤睇吓嘢好過．．
EDMOND：唉，一於三十六著，走為上著，請請，請請．．．
HONG/ALICE：喂．．喂．．
＊ ＊ ＊ ＊ ＊ ＊
背景：摩天輪上
FLORA：嘻．．
BRIAN：傻妹，做咩响度傻笑呀？
FLORA：無呀，邊有傻笑啫．．．
BRIAN：你唔講，我就唔問o架喇．．．
FLORA：好喇，好喇．．我只係由細到大都無正式同男朋友坐過摩天輪，所以今日如願以償，有Ｄ開心，咁咪笑咗出嚟囉！
BRIAN：嘩，你當我三歲細路哥咩，你樂美人天姿國色，有咩可能從來無人同你坐摩天輪浪漫過呢？
FLORA：真o架，真o架 ！大學之前，屋企家教嚴，又係讀女校，邊有話可以拍拖呢．到讀大學個時，又要專心讀書，雖然有人追，但係多數都係一大班人出去，而Ｄ男仔又未有太好經濟能力，就算去街都係食餐飯，睇場戲咁啫，邊有咩浪漫呀．．所以以前就會成日幻想同心愛嘅人一齊坐响度,甚至有人响度同我求．．．
BRIAN：（打斷Flora話）哈，哈．．你依家好似同我‘匯報’緊咁播．．其實依家嘅年代，男女嘅關係都唔係以前咁架啦，你又唔駛講到自己好似好單純咁噃！
FLORA：喂，韓峰！你依句說話咩意思呀！你以為我樂花係咩嘢人！
BRIAN：OK，OK，SORRY，SORRY．當我講錯說話啦！我地難得係嚟開心嘅，唔好破壞個MOOD好無？
FLORA：哼．．．
BRIAN：好喇，依家公主又變成扁咀BEAR BEAR喇，唔知係咪想王子錫錫呢？咁．．我．嚟．喇
FLORA：嘻．嘻，你就想，你再過嚟，我開門跳出去架！
BRIAN：唔敢喇，美人，我乖乖坐定定就係啦．．．
FLORA：峰，我有Ｄ嘢想問你．．
BRIAN：係，公主即管問，奴才定必本死相告！
FLORA：咪玩啦，正經架．．．
BRIAN：OK．．認真．．法官大人請問！
FLORA：我．．我想知．．你有無諗過結婚呢？
BRIAN：吓．．
FLORA：我．．我．．我嘅意思係，大家都相處過一段日子．．我其實覺得大家都幾夾啫．．或者我地可以考慮吓再進一步囉．．．
BRIAN：喂，你睇．．下面Ｄ人幾細，原來响咁高望落去個種感覺係咁特別嘅．．．喂，不如我地下次去試吓SKY-DIVING 囉．．
FLORA：喂，BRIAN！！你到底做咩！點解每次我一同你講到依個TOPIC，你就一定會左顧右盼咁去敷衍我！依家我地响咁高嘅地方，你亦都避無可避，你今日點都要同我講清楚架喇！
BRIAN：．．． ．．．
FLORA：出聲呀！
BRIAN：OK，．．FLORA．我地大家都係成年人，處理各樣事情嘅時候，其實都應該成熟Ｄ
FLORA：你咁講係咩意思？
BRIAN：清楚D講，我唔想令你失望，我係唔可能同你結婚嘅！
FLORA：點解唔可能？．．．你．．．你已經結咗婚？
BRIAN：唔係，我未結過婚．．只係．．（深呼吸一口氣）我．．我已經有未婚妻喇！
FLORA：吓！！！
BRIAN：對唔住，FLORA，我唔係想隱暪Ｄ咩，我一直都想搵機會同你講清楚，只係無準備响咁嘅環境下同你講啫．．．
FLORA：（揭斯底里）你．．你唔需要再講任何嘢喇！（大力拍窗）出去呀，俾我出去呀！
BRIAN：FLORA，FLORA，你唔好咁啦！你冷靜Ｄ聽我講啦！（抱著她）
FLORA：你放開我呀！我有眼無珠，竟然．．竟然會愛上你依個騙子！
BRIAN：FLORA，你信我啦，我真係唔係有心呃你o架！我．．我對你嘅感覺係認真o架！！
FLORA：你既然已經有未婚妻，根本就無資格對我有感覺，點解你仲要嚟招惹我？！你亦根本無權利去認真，你又點能夠仲可以口口聲聲話對我動情？？
BRIAN：我．．．我都唔知．．
FLORA：你．．你．．唔知（慘笑）．．．我先應該話唔知點解千揀萬揀，就竟然揀咗你依個良心狗肺嘅衰人！！
BRIAN：FLORA．．．我．．．
FLORA：我樂花，今日發誓．．同你韓峰一刀兩斷，今日以後，恩斷意絕！(摩天輛停下，FLORA奪門而出)
BRIAN：FLORA．．．FLORA．．．
*** 第七回完 ***
第三章 盛放 -- 熱戀篇 PASSIONING
第六回 花圃 NURSERY
背景：夢之花花店
EMILY：早晨太太，有無嘢可以幫到你呀？
客人Ｃ：早晨，你好．我個BB，佢今個春天就要出世喇．所以我同我先生希望响花園度做個小園圃嚟迎接一個新生命嘅來臨啫．唔知有ｄ點樣嘅花比較適合呢？
EMILY：真係恭喜你呀，太太．咁開心嘅事，等我攞盆特別嘅花俾你啦．．〔搬櫈〕
嗱．．你坐低先啦，我入一入去吓．．
客人Ｃ：哦，咁唔該哂呀，小姐你真係好人喇．．
EMILY：唔．．太太．．就係依盆喇，你睇吓鍾唔鍾意？
客人Ｃ：依，依盆咪係馬蹄蘭．．不過，依．．Ｄ顏色好靚呀，有Ｄ粉紅，有Ｄ淺黃色，睇落真係好舒服呀．．
EMILY：係呀，依盆海芋由一送嚟我就特別鍾情架喇，因為真係好靚，好獨特，所以就留低養住先，希望為佢搵個適合嘅主人，今日似乎係好嘅機會喇．．
客人Ｃ：白色嘅海芋我就見得多，不過咁特別嘅就真係第一次見囉．．
EMILY：唔．．係囉．．你依家有咗ＢＢ，係最適合對住一Ｄ色澤淡雅Ｄ嘅花架，再加上海芋本身Ｄ香味亦唔係唔濃，真係好適合你種响你地嘅小花圃架喇．．
客人Ｃ：唔．．依一盆花真係好靚呀，不過係你嘅珍藏．．好似唔係太好噃．．
EMILY：太太你唔好咁講啦，我不知幾開心可以將依盆花用嚟一個迎接新生命咁開心嘅事啦！再加上海芋本身就係代表壯大嘅美同埋希望嘅意思，用嚟送俾你同埋你就嚟出世嘅ＢＢ就最貼切啦！
客人Ｃ：吓，MUG原來仲有咁特別嘅意思架．．咁．．我就恭敬不如從命喇．．請問盆花幾多錢呢？
EMILY：唔駛喇．．太太，就當我送俾ＢＢ嘅禮物啦．．
客人Ｃ：咁點得呢？
EMILY：太太你唔好客氣啦，我真係好開心可以有人用個花圃嚟迎接出生ＢＢ嘅禮物，就當係我小小嘅心意啦．．．
客人Ｃ：咁．．咁我同先生先多謝你先．．
EMILY：最緊要係你要好好保養，生個肥肥白白嘅寶寶呀．．係喎．．依段時間，你同ＢＢ都唔好‘控’太埋去聞Ｄ花住呀，要到ＢＢ大個一Ｄ先可以貼埋Ｄ架．．
客人Ｃ：點解呢？
EMILY：哦，因為有聞話依隻花Ｄ花粉可能會影響中樞神經架，所以以防萬一，都係小心Ｄ啦，係咪．．
客人Ｃ：哦，原來係咁，我知道喇．．
EMILY：好啦，我幫你送上車呀．．
客人Ｃ：唔該哂呀EMILY，你真係好熱心呀．．
EMILY：唔好客氣啦，助人為快樂之本呀嘛．．你睇我都幾開心．．
＊ ＊ ＊ ＊ ＊ ＊
背景：某處鬱金香花園
BRIAN獨白：HI．．我就係o個一個俾形容為‘薰衣草’嘅BRIAN．．
响我同FLORA嘅發展入面，我地亦曾經有過好似初戀一樣，令人心醉嘅時刻．．當我每次一食D帶花生味嘅嘢，我就不期然會去諗依一個令人刻骨銘心嘅女人同埋佢個一份甜味．．
我唔能夠話自己從來都無為FLORA心動過，甚至，其實我亦真係有試過為咗佢嘅付出而產生過一刻要同佢廝守終生嘅衝動，但最後，因為我嘅理智，我亦只可以選擇做一個好唔負責任嘅人，只可以默默咁離開．．．
FLORA：嘩．．．嘩．．．好靚呀
BRIAN：喂，你唔好‘孔’咁埋啦，因住你Ｄ花粉症又發作，變成紅鼻哥BEAR BEAR吓，先旨聲明吓，依排ＤPROJECT咁多，我絕對唔會心軟批假俾你架！
FLORA：蝦．．你．．哼．．到時我就响假紙上面咁寫囉：‘無良老闆存心陷害美貌職員，私下約會有花粉症女同事到鬱金香花園共聚午餐商談，意圖謀殺囉’，哈
BRIAN：好喇，好喇，你把口我真係搶唔到ＤMUG嘢優勢架喇．．再俾你做多兩年律師，我真係無立足之地架喇．．
FLORA：嘩，點敢呀，話哂你都係我師父，欺師滅祖俾雷劈架．．．哈哈哈．．
BRIAN：好喇．．BEAR BEAR徒弟仔，我地可以去食LUNCH未呢，你師傅個肚就真係打緊雷喇．．
FLORA：係嘅，等你徒弟我好好咁‘侍候’你老人家吓．．
BRIAN：〔邊用刀叉切食物〕FLORA，依排你返工返得習慣嘛？
FLORA：唔．．都OK啦，有唔明白嘅地方都好多同事肯幫，大家熱熱鬧鬧都幾開心呀．．係個上司絕頂麻煩囉，成日問長問短，問東問西咁．．哼．．
BRIAN：你呀，成日好似同我有仇咁．．可唔可以和平相處呢？
FLORA：哈，若果你要搵個好似小綿羊咁嘅女朋友，你係咪約錯人呢？
BRIAN：哦，樂小姐，MUG 我今日係約女朋友出嚟咩？我都應該CHECK CHECK我嘅DIARY睇一睇先．．哈哈．．
FLORA：你．．你．．
BRIAN：好喇．．成日吵吵鬧鬧影響胃口，食咗嘅美食就吸收唔到架喇．．
FLORA：唔．．都係，好喇．．暫時停戰先啦．．
BRIAN：暫時．．永久係咪好Ｄ呢？
FLORA：呀，依度嘅 Grilled Salmon真係幾有水準喎，你份PorterHouse呢？
BRIAN：唔．．SO NICE，你要唔要試Ｄ呢？
FLORA：好呀．．呀〔張口〕
BRIAN：小心熱呀．．．
FLORA：好喇．．見呀師傅咁識做，等我依個做徒弟嘅等陣都服侍吓你啦．．
BRIAN：點服侍先．．
FLORA：保持神秘，唔話你知住．．
BRIAN：好，又拭目以待先．．
〔稍過一會〕
BRIAN：嘩．．好飽．．好飽．．．食完散吓步都幾好．．人生真寫意．．
FLORA：你有無覺得差咁Ｄ嘢呢？
BRIAN：唔．．．講落又好似係．．係咩呢？
FLORA：有無覺得個口嘅味覺淨咁Ｄ呢？
BRIAN：講開又係．．．差咁Ｄ甜味噃．．．咁．．嘻嘻．．
FLORA：你唔好諗埋一邊呀．．
BRIAN：你頭先又唔俾我ORDER甜品，水果都唔得．．喂，你係咪驚我無錢找數先．．唔駛驚喎，今時今日嘅BRIAN HON唔會話連俾一餐半餐幾百蚊嘅LUNCH都俾唔起架，吓嘩！！
FLORA：我梗係知啦．．唔會同你慳噃．．不過，係有Ｄ目的嘅．．
BRIAN：嗱．．係咪呢．．要甜蜜蜜香吻都可以食咗DESSERT先架嘛．．
FLORA：費事同你講，嗱，俾你架，坐定定享受啦．．
BRIAN：依，睇唔到你個手袋原來內有乾坤噃．．MUG嚟呢？嘩．．好香好香．．花生糊喎？
FLORA：嘻．．係咪無諗過响依度都有咁香滑又熱辣辣糖水食呢？
BRIAN：嘩．．你煲架？
FLORA：梗係啦．．放心喎，我唔會買碗外賣然後話係自己煮架噃．．
BRIAN：我唔係咁嘅意思啦．．依，你又知我鍾意食花生糊嘅？
FLORA：鍾意一個人又點會注意佢嘅喜好呢？你成日都花生不離手，你自己唔知嘅咩？
BRIAN：都話你嘅觀察力有番咁上下架啦．．．你自己都食Ｄ啦，仲响度做咩呢？
FLORA：啱啱OK．．嗱，食埋Ｄ生菓啦．．
BRIAN：嘩．．你原來靜靜雞切生果呀．．
FLORA：食得開心嘛．．
BRIAN：真係開心，仲真係好SURPRISE．．
FLORA：SURPRISE？
BRIAN：好驚訝你原來係一個又細心，又周到嘅女仔．．
FLORA：哼，依家先知．．唔係你以為我真係十指不沾陽春水嘅細路女呢．．
BRIAN：FLORA．．．
FLORA：係．．唔．．．〔親吻〕
BRIAN：THANK YOU．．．依個係我送返俾你嘅DESSERT．．．嘻嘻．．
FLORA：喂．．你．．去邊呀？
BRIAN：仲留低俾你‘摑’咩．．走喇，美人．．帶你去睇日落呀！
＊ ＊ ＊ ＊ ＊ ＊
背景：HONG 車
ALICE：早晨
HONG：早晨，噚晚瞓得好嘛？
ALICE：唔．．都OK嘅，你呢？
HONG：幾好．．你唔會介意我今日約你出嚟嘛？
ALICE：傻啦，你咁講我反而唔知點答你架～
HONG：咁响你俾你嘅答案俾我之前，我可唔可以帶你去一個地方先呀？
ALICE：邊度呢？
HONG：我屋企．．
ALICE：吓．．唔得！！
HONG：你．．你唔好誤會啦，我只係想俾你睇Ｄ嘢，絕對無非份之想架．．
ALICE：都係好似唔係咁方便架喎．．
HONG：你放心啦．．我發誓啦．．我真係唔會對你做Ｄ越軌嘅事架．．
ALICE：咁我量你都唔敢．．
HONG：咁，即係點呢？
ALICE：OK啦，但係只可以去睇你要我睇嘅嘢，同俾我要講嘅嘢架咋．．
HONG ：OK．．
〔汽車停下〕
HONG：到喇．．
ALICE：你真係唔會呃我呀嘛．．
HONG：係呀，信我啦．．跟我嚟啦．．
ALICE：依．．你唔係要去廳咩，點解行依個方向呢？
HONG：唔好咁心急先啦．．都係咁喇，你依家合埋隻眼先啦．．
ALICE：吓．．．
HONG：你相唔相信我先？
ALICE：唔．．．應該都信嘅．．
HONG：咁就得啦．．我數一二三，你合埋隻眼，拖住我行，直至我話可以開眼先睇啦．．
ALICE：好啦，又睇吓你係MUG嘢葫蘆賣MUG嘢藥啦．．
HONG：小心呀．．好喇．．停啦．．
ALICE：睇得未呀？
HONG： OK喇，你依家打開眼啦．．
ALICE：嘩嘩．．．．我係咪發緊夢呀．．．
HONG：依度就係我為你準備嘅WONDERLAND喇．．我唔識講嘢，只係希望你見到咁靚嘅嘢會開心Ｄ啦．．．
ALICE：依．．依度係你整架？
HONG：唔．．．由我上次同你表白之後，我每一次諗起你嘅時候，我就會入嚟依間溫室去靜落嚟．．後來我就諗起可以將依一份思念做成一Ｄ得意，或者特別Ｄ嘅嘢．．．
ALICE：吓．．．咁後來呢？
HONG：咁．．咁後來我諗你嘅次數越來越密，所做嘅嘢越來越多．．整整吓就變成依家你見到嘅小天地囉．．
ALICE：康．．．
HONG：ALICE，無論你俾我嘅係點嘅答案，我都只係想你知道，我係真心真意希望你時時刻刻都開開心心，都希望見到你最可愛嘅笑容啫．．
ALICE：其實．．其實．．依一個禮拜，我反來覆去咁諗，真係擔心無論邊個決定都會係錯．．．〔停頓〕
HONG：．．．〔呼吸緊張〕
ALICE：而當我頭先睜開眼個一刻．．我就更加可以肯定，我嘅決定係．．啱嘅！〔走開〕
HONG：ALICE．．
ALICE：〔大叫〕康．．多謝你呀．．你要應承我，依個WONDERLAND只係屬於我一個，好唔好？
HONG：〔先是一顎，大叫〕一定！I PROMISE！依個WONDERLAND同我個心一樣只屬於ALICE一個．．．
*** 第六回完 ***
第五回 揭盅 MASTERMIND
背景：HONG 車上
ALICE：咳．．咳．．ERRR．．唔．．唔好意思呀．．
HONG：唔緊要啦．．我又係咁啱要返學校啫．．
ALICE：因．．因為又係個堂TUTORIAL囉．．所以我先咁緊張之嘛．．
HONG：原來係咁．．我都估到架喇．．ANYWAY啦，你食咗嘢未呀？
ALICE：梗係未啦．．頭先緊張得我呀．．邊度仲諗到要食嘢喎．．你講起．．嘻．．又好似有Ｄ餓添．．
HONG：趕唔切食嘢架喇，不如咁啦，後面個盒仔入面有份SANDWICH，你唔介意就攞去食啦．．
ALICE：咁點得架．．
HONG：得啦．．
ALICE：哈，咁我唔同你客氣架喇，至多下次請番你食飯啦．．
HONG：哈哈，一份三明治換一餐飯，有賺呀！
ALICE：嘩，好食喎，你整架？
HONG：梗係唔係啦．．咁忙，邊得閒呀！
ALICE：哦．．我知喇，梗係女朋友啦（講真，講依句說話嘅時候我真係有Ｄ酸溜溜嘅感覺，當堂食唔落）
HONG：係就係女人．．．
ALICE：哼．．唔好意思喎，我唔知係你嘅甜蜜午餐，早知我就唔食啦．．．
HONG：你聽埋先啦，係我媽咪整架．．我邊有女朋友啫．．
ALICE：吓．．你無女朋友，搵鬼信咩
HONG：真架，真架．．．我都唔鍾意識女仔嘅．．
ALICE：吓．．MUG．．MUG你係基．．
HONG：梗係唔係啦．．．只．．只係我份人唔識講嘢，只係識讀書架咋．．
ALICE：哦．．不過，你咁好人，我仲以為你一定有好多女仔鍾意添．．
HONG：EERRR．．． 大部份Ｄ女仔講個Ｄ嘢我好多都唔係好明嘅，我同佢地講功課佢地又唔鍾意嘅．．．
ALICE：唔怪之得啦．．依．．就到喇喎．．喂，你响邊度上堂呀？
HONG：BUILDING 64．．你呢？
ALICE：我都係喎，咁啱嘅，泊好架車一齊行呀．．．
HONG：好呀．．．
ALICE：嘩，你攞咁多嘢上堂嘅？
HONG：嘻嘻，我係去上堂，不過係教o個個．．
ALICE：吓．．MUG你係TUTOR嚟架，真係失敬哂喎．．依．．咁你教邊班呀？
HONG：２５５囉．．
ALICE：哦．．２５５．．咪住．．２５５？
HONG：係呀．．２５５呀．．ＭＧＣ１０２０嘛．．
ALICE：噢，MY GOODNESS．．．
HONG：喂，你做MUG呀，呆咗嘅？唔驚遲到喇？
ALICE：我．．我係施麗愛呀．．．ALICE SZE呀．．．
HONG：OHHH．．哎呀，我ＤNOTE呀．．．．
＊ ＊ ＊ ＊ ＊ ＊
背景：清晨，FLORA 屋企門口
BRIAN：FLORA．．FLORA．．
FLORA：唔．．．唔．．．
BRIAN：FLORA．．天光喇．．返入去瞓啦．．．
FLORA：唔．．唔．．．依度係邊度．．
BRIAN：依度係我架車呀，美人．．．
FLORA：唔．．依．．BRIAN．．．噢．．．天光啦．．
BRIAN：唔．．噚晚你飲醉咗，由美人魚變成睡公主，不過你身邊嘅王子MUG都無做過呀．．所以你咪醒唔到囉．．哈哈．．
FLORA：OH．．唔．．唔好意思呀．．．
BRIAN：傻啦，除咗條腰骨有Ｄ痠同埋有少少涼意之外，大致上都係一級享受嚟嘅，話哂都係美人在抱啦．．．
FLORA：嘩．．．噢．．SORRY．．．
BRIAN：哈哈，有人蝕哂低添．．ANYWAY，快Ｄ入番去瞓多陣，然後返工啦．．我唔想隻大笑BEAR BEAR要對住隻熊貓美女呀．．．
FLORA：你．．好喇．．睇在噚晚個餐份上，我就當借咗聾耳陳隻耳，MUG都無聽過啦．．．
BRIAN：識反駁即係醒哂啦．．好喇．．入去啦．．晏Ｄ公司見．．
FLORA：晏Ｄ見．．BRIAN．．多謝哂．．．
BRIAN：唔好婆媽啦．．BYE BYE 喇．．
返到入去屋企，我成個人醒哂．．．真係瞓唔番喇．．
我不禁嘗試回諗返噚晚發生嘅事．．．
我同BRIAN大家玩得好顛，飲咗幾多酒．．．响間餐廳，我又跳舞，又唱歌，又大笑．．真係好開心，好開心．．
响個舞池入面．．我地跳咗一隻慢舞．．我抬頭望住依個攬住我嘅人，真係覺得佢好可愛．．仲有個一陣傳嚟嘅DESIRE香水味．．真係令我好心醉．．．
個一刻．．我真係明白異性相吸係MUG嘢道理．．．
但係，我亦唔明白．．或者係應該有Ｄ懷疑．．我嘅魅力係咪有問題呢？
如果唔係．．點解．．點解對住我成晚，佢都可以安然無恙咁無俾任何事發生，只係俾我好安靜咁瞓係佢懷中一晚．．佢處心積累咁安排依一切．．仲有佢似是而非嘅說話．．到底，佢想點呢？
＊ ＊ ＊ ＊ ＊ ＊
電話響起： ’鈴．．鈴．．’／ ’ 
oo．．Doo．．’
FLORA/ALICE：HELLO
BRIAN/HONG：喂．．係我．．．
FLORA/ALICE：哦．．係．．．
BRIAN/HONG：我．．我有Ｄ嘢想同你講呀．．．
FLORA/ALICE：哦．．咩事呢？
BRIAN/HONG：我．．我諗咗幾晚．．．
FLORA/ALICE：唔．．．
BRIAN/HONG：雖然，雖然可能係唔啱．．．
FLORA/ALICE：唔．．．
BRIAN/HONG：但係．．但係．．我諗．．我諗．．我鍾意咗你！！
FLORA/ALICE：噢．．．
*** 第五回完 ***
第四回 估估吓 RIDDLES
背景：MBH 律師事務所辦公室，山頂某自助餐廳
〔電話響起〕
其實同BRIAN一開始嘅時候，真係有好多曖昧位，大家就好似猜謎語咁，你又估估吓，我又估估吓，完全摸不著頭緒．．．我依家諗番，仍然好難去判斷到底係邊個去帶出咁樣嘅氣氛，或者係我地大家都對對方有ｄ‘情不自禁’啦．．．
FLORA：HELLO，FLORA SPEAKING
BRIAN：早晨呀，美女
FLORA：韓先生，麻煩你莊重Ｄ喎，你唔覺得响辦公室入面，你以上司嘅身份對我咁樣稱呼係好唔妥當嘅咩．．．
BRIAN：OK．．OK．．．樂小姐，請問你今晚有空嗎？
FLORA：韓大人，响我回答你嘅提問之前，我係咪有權去知道你問依個問題嘅目的呢？
BRIAN：C’MON，FLORA，作為你嘅上司，我唔係連約你出去一個晚上都要用EXCUSE或者攞PERMIT啫，係咪？
FLORA：當然，若果係同公事有關嘅，我作為一個受聘嘅員工係無任何理由拒絕嘅．．．
BRIAN：咁，若果係私人嘅就唔通我無權去約會你咩？
FLORA：WELL．．．有咁嘅必要咩？
BRIAN：我唔明白，點解你每次對我都要咁有介心呢？你到底驚Ｄ咩嘢呢？
FLORA：痴線，好喇，玩夠喇．．你到底想點呢？
BRIAN：好，快人快語，我今晚要同你出去．．私人嘅約會！
FLORA：我係咪有拒絕嘅權利呢？
BRIAN：無！
FLORA：OK，幾點，响邊度？
BRIAN：７點鐘响你屋企樓下．
FLORA：好．（掛線聲）
因為緊張，我用‘極速’去完成咗我整日要COMPLETE嘅TASK，然後，準時５點半踏出公司嘅大門．．．走嘅時候我不禁望咗裝响RECEPTION嘅VIDEO CAM一眼，我唔肯定到底BRIAN仲响唔响度，只係有Ｄ心虛唔知佢會唔會AWARE到我嘅緊張啫．．．
我準時７點鐘行到我住嘅APARTMENT樓下，已經見到佢個架寶藍色嘅ＮＳＸ泊咗响度．．
我刻意咁放慢自己嘅腳步，保持住自己個一份高雅．．唔係，應該係高傲至啱．．．走近佢身邊．．．
一個最基本嘅紳士動作，佢打開佢嘅車門，然後作狀彎一彎腰同講咗一句．．．
BRIAN：有請我最尊貴嘅樂公主上座．．
FLORA：點咁當呀．．
BRIAN：T’IS MY PLEASURE
FLORA：咁恭敬不如從命囉
〔車門關上，即有悠揚古典音樂〕
BRIAN：有云是──香車美人，果然名車應該係要有美人相伴先可以算得上相得益彰嘅．．
〔FLORA：講真佢當時嘅表情真係幾得戚，雖然某個程度上我都好同意佢嘅講法．．．响忙完一日嘅工作之後，坐响佢依架名車上，又真係令人好有鬆弛嘅感覺．．〕
BRIAN：唔知我地嘅樂公主今晚想食Ｄ咩呢？
〔FLORA：其實我都真係幾鍾意佢用樂公主嚟叫我〕
BRIAN：依．．我好似唔係約錯人架，我唔應該接咗個啞咗嘅人魚公主上車嘅噃？！
〔FLORA：依個人有時真係好鬼黑你憎嘅．．．我其實係用沉默作我對佢無聲嘅抗議，鬼叫佢強迫我同佢食飯呀〕
BRIAN：哈，似乎我真係對依位啞公主無計可施噃．．WELL．．咁無辦法啦，我今晚就唯有做一台‘獨腳戲’啦．．好彩我平時都訓練有素啫．．．
〔FLORA：點解呢？〕
BRIAN：作為一個訴訟律師，我習慣每一次上庭前一晚都會‘自編自導自演’一幕訴訟，以瞭解各人嘅心態嘅．．．
〔FLORA：唔怪之得佢好似可以睇穿人地諗MUG咁啦！咁亦真係佢成功嘅地方嘅，有幾多律師肯咁花時間去準備呢？〕
BRIAN：你係咪好奇怪今日我點解要約你食飯呢？
〔FLORA：係呀．．〕
BRIAN：其實無他嘅，中國人有云‘民以食為先’，作為一個合作伙伴，我當然用最直接嘅方式去‘賄賂’你啦！祭咗你嘅五臟府，就可以為所欲為啦．．．
〔FLORA：哼，豈有此理〕
BRIAN：唔好嬲住．．我當然知道樂小姐幾咁清廉如鏡啦，所以用一餐便飯又點會打動得到呢．．不過，我相信以樂小姐咁有智慧嘅人，都唔難猜到我對你係另懷目的嘅．．
〔FLORA：吓，唔係吓嘩？！？！〕
BRIAN：相信樂小姐都知道自己有幾咁國色天香，簡直係沉魚落雁啦．．而且，美貌與智慧都兼而有之．．對於咁完美嘅女性，又點能夠唔令人心動呢，係咪？
FLORA：喂，好喇喎，你唔好越講越過份喎！〔講真，諗返起嚟，我當時真係好驚佢要同我表白〕
BRIAN：哈哈，唔過份．．．又點得你樂小姐．．開你嘅金口呢，係咪？哈哈哈．．．
FLORA：你．．
BRIAN：好喇．．到喇，等你食完依餐之後先決定要唔要嬲我好無？
FLORA：哼
唔經唔覺，我地就已經去咗山頂，我不得不承認同BRIAN一齊嘅時間真係好容易過，因為佢真係好識製造氣氛，多數時間都有SURPRISE，好少有DEAD AIR嘅．．．
走入依間餐廳，入面比平時熱鬧好多．．．原來係佢地一年只有一次嘅SEAFOOD NIGHT．．．
我唔知BRIAN係咪真係知道我係名副其實嘅SEAFOOD LOVER，依個亦係我獨自留低响度發展嘅原因．．我對海鮮嘅鍾愛簡直係到瘋狂嘅地步．．．
但係，我真係無留意到間餐廳有咁嘅SEAFOOD NIGHT．．．我亦衷心咁APPRECIATE佢嘅細心．．．
面對住一堆又一堆我最心愛嘅食物，我對BRIAN嘅所有介心都消失得無影無蹤，我不期然同佢好自然咁談天說地起嚟．．．
個一晚嘅我真係笑得好開心，覺得好滿足，好幸福．．．我盡情咁吃喝，盡情跳舞，盡情大笑，足足‘喪玩’到１點幾先俾BRIAN半推半就咁送上車送返屋企．．．
＊ ＊ ＊ ＊ ＊ ＊
背景：晚上，ALICE屋企
〔手機響起〕
ALICE：HELLO，ALICE SPEAKING
HONG：OH．．HELLO，THIS IS HONG，I HAVE GOT YOUR MESSAGE，YOU LIKE TO KNOW YOUR TUTORIAL TIME，RIGHT？
ALICE：OH YES．．I AM LOOKING THAT FOR QUITE A WHILE ALREADY!!
HONG：YES，I SEE．．ALRIGHT，I’VE CHECK IT OUT FOR U，THAT IS TUESDAY 1-2 AT ROOM 255
ALICE：ALRIGHT，TUESDAY 1-2, ROOM 255，RIGHT？
HONG：YUP．．THAT’S RIGHT．．ANYTHING ELSE I COULD HELP YOU WITH？
ALICE：OH NO．．．I THINK THAT IS．．THANKS FOR THAT．．
HONG：NO WORRIES，CYA ON TUE THEN．．
ALICE：C’YA，BYE NOW．．．
HONG：BYE．〔掛線聲〕
ALICE：依個人把聲咁熟嘅，我係邊度聽過呢．．．唔．．．
ALICE：好不容易到星期二．．．竟然．．．
ALICE：〔電話〕喂．．JESSIE呀．．．ALICE 呀．．我依家响火車站呀．．今日Ｄ火車竟然停駛呀．．我無火車返學呀．．點算呀？？
JESSIE：吓．．．咁大濟．．打的啦．．．
ALICE：鬼唔知咩，排的士條龍仲長過水蛇春呀！點算呀．．．
JESSIE：小姐，咁就咪返啦，SKIP一堂唔駛死架！
ALICE：唔得呀，今日又係個堂TUTORIAL呀，上次已經上唔到，今日再唔上就MISS咗好多嘢架喇．．．依．．你都幫唔到架喇．．我自己諗辦法啦．．〔嘟．．嘟．．〕
JESSIE：喂．．喂．．．
ALICE：我望住個條好長嘅等的士龍，同好少嘅的士流量．．．再望一望就快１２點嘅手錶，我撥咗依一通我本來諗住點都唔會打嘅電話．但係响依一刻，我真係只諗到依個人個句：
HONG：．．．依度有我個名同電話，當我欠你一個人情，以後你隨時有咩需要，你就打俾我啦．．．
ALICE：（電話響）死就死啦，若果佢無聽電話，咁就當我地無緣啦．．．
HONG：HELLO
ALICE：杜子康．．．
HONG：係．．係．．邊位．．
ALICE：施麗愛呀．．你依家响邊？
HONG：施．．施麗愛？
ALICE：o個個你話有MUG嘢都會幫o個個呀！！
HONG：哦．．記得喇．．．
ALICE：仲講，無論你依家响邊，做緊ＤMUG，你要即刻嚟XX火車站出面接我呀！
HONG：吓，即刻？！
ALICE：係呀．．．我只係俾你十五分鐘咋吓，你若果唔到我就．．我就喊～
HONG：好好好．．１５分鐘內到．．．
ALICE：坐响火車站出面張長櫈，講真，我都係估估吓，唔肯定依個只有數面之緣嘅人係咪真係會遵守佢嘅諾言．．．
連我自己都唔解釋唔到憑MUG嘢可以要佢對我依個毫無瓜葛嘅人‘言聽計從’．．．諗落都幾無里頭．．．
但係潛意識又令我對佢好有信心，將自己個份希望放咗响佢身上．．覺得佢一定唔會呃我，唔會令我失望嘅．．．就係懷住兩份咁樣矛盾嘅心態吓，我就等吓．．等吓．．等吓．．．
*** 第四回完 ***
