今個星期有幸獲903 o既麻利亞邀請做訪問,每日聽Dik Dak Dik Dik Dak都聽到佢,今次終於見到真人喇~

個訪問會o係今個星期日 (6月28日) 11am-12 o係"my903"節目會播出,有機會就留意o下喇

做訪問前影o下相,留意隔住玻璃o既另一面就係麻利亞喇

另一張由另一面望番過o黎o既相...嘻嘻

做完訪問o黎個合照啦,因麻利亞話唔好出鏡,咁就用個"麻"字保持神秘啦~ 想知多o的麻利亞o既話可以上佢個blog睇睇:

http://hk.myblog.yahoo.com/malaylayer  <---麻利亞blog

o係度要多謝903麻利亞o既邀請!!

上星期o既明Teen有我o既訪問,主題係講創作人對跨多媒體創作o既睇法

zoom大o的,希望大家睇到o的字~~

大家好! 上星期我接受o左香港電台Teen Power podcast節目: <<漫動作之本地漫遊>> o既訪問,兩part訪問都出o左喇,大家可以去港台呢度聽番:
 (上到去click右面"電台專訪"section)

http://www.rthk.org.hk/elearning/hkillustrators/index.htm?section=local_main&id=17&page=1

又或者直接click下面兩條link聽都得:

第一 part

第二 part
以下係我同節目主持人紫龍o既合照,o係度多謝紫龍o既邀請

當紫龍好細心講解訪問內容o個陣,我發現有人偷影我...哈哈~

呢張係o係港台網頁copy出o黎o既相(紫龍影o既),我扮DJ個樣好搞笑

之前因好忙o既關係,未得閒去LV個藝術展,難得今日得閒就睇睇啦~

去之前到新世界中心入面o既UCC個tea,好鍾意呢間餐廳,耐唔耐就會o黎食tea 或dinner, 好在今日tea唔使位~~

好鍾意呢類日式西餐,o的o野食好似卡通咁,好可愛~

呢度 o既甜品亦係推介之一,我就好鍾意佢o地o既waffle 喇

最好笑係佢杯檸茶,o的檸檬大過個杯口...哈哈

你 睇,就算篤佢落去,另一片都係落唔到....

另外鍾意呢度就係佢o既環境,因依家要過條tunnel先過到o黎,令到新世界中心好自成一各,由餐廳望番出去真係好hea好舒服~

好啦飽飽就行過去喇,成座香港藝術館被LV藝術家o既設計包住,睇得出香港藝術館對今次展覽o既重睇程度

連長廊都轉晒呢次展覽o既旗仔

影o左一陣相就入正門買飛入場喇

每一個人都會有一份展覽簡介,仲要貼張貼紙先入得場o架~

如果想更了解在場藝術家o既展品內容,可以好似我咁租個講解機,租用費都係10蚊o者

因為場內係唔俾影相o既,所以下面o個張相已經係我行完個展覽,難得o係gift shop前有幅村上隆展品,既然可以影相就影張啦

今次呢個展覽真係做得好好,能夠親身睇到所有著名藝術家o既真跡實在好難得~

而因為我超鍾意村上隆o既關係,對我o黎講淨係睇村上隆o既展館已經值回票價,真係好正

展覽去到8月9日,有時間o既就去睇o下啦!

P.S. 成人票價30蚊, 學生好似15 (好似咋~)

如果好鍾意會牛o既話,我會建議你去九龍城o既清真牛肉館,嫌唔順路o既話,隨處揀間比較好少少o既越南餐廳都會食到一個叫牛肉七味o既菜~

故名思意,牛肉七味就係七度以牛肉做o既菜,大致上各間餐廳o既牛肉七味都差唔多,只係有少量特色上o既分別同份量,今日我去食o既就係又一城Rice Paper o既七大牛肉滋味套餐~

可能中國人對七樣菜唔好意頭,所以去過幾間餐廳都會將某幾道菜擺埋一碟上,Rice Paper就分三道菜上,你睇  後面o個個人開心到舉晒手o添...哈哈 

一般牛肉七味都會有o既碎牛肉粥越南style o既粥比較"傑", 米粒亦唔會煲到爛晒(類似潮洲粥咁) ,加埋越南o既香料真係好好味~

另外有o既就係牛柳卷(牛柳包住牙菜)、 牛肉沙律、 嫩牛肉餅同 金不換牛肉樣樣各有特色好好味,我特登夾晒四樣落隻碟度俾大家睇

而最後一樣就係生牛肉火鍋,火鍋裡面有酸紅/白蘿白,所以湯底係有o的酸酸地o既 (曾經聽過係因為要解o左生牛肉o既肥利)

o的牛肉好靚,除o左牛肉仲有好多粉絲,加上之前個粥,其實都好飽o下

大特寫個menu, 機會大家都可以試o下~

上星期日太陽報o既訪問出o左,o係呢度post 俾大家睇啦

題目為"愛觀塘 愛草根" ,其實俾我揀元會愛豪華多o的 ,所以大家有咩鮑參翅肚都不妨寄俾我...哈哈

今次訪問好開心,記者同攝影師都好好人,o係度要多謝太陽報o既訪問






以下係摘自2009年5月31日的太陽報副刊

本地受歡迎漫畫人物阿呢，其「老竇」梁進一身美式街頭打扮，看似跟草根味濃的觀塘區不相襯，查實梁進閒時最愛在區內流連，更情迷港式美食，平日都是在區內 的茶餐廳、打冷店打躉，又會到鐵皮屋尋找兒時玩具，這些地道生活的點點滴滴，全都在梁進筆下一幕幕重現眼前。

在觀塘長大的梁進，移民美國十年後回流，落腳地依然是觀塘。鍾情地道風情的他，區內的茶餐廳及打冷店就是其日常「搵食」熱點。「香港處處有美食，像打邊爐、茶餐廳、打冷就極具特色！」梁進笑言愈地痞愈鍾意，而這種地痞情意結亦反映在其創作上。 

茶餐廳 獨愛凍飲

梁進帶着小記在觀塘鬧市穿插，熟悉地走進一間舊式茶餐廳，不用思索便點了 菠蘿包跟凍檸茶。「平日多會揀常餐、特餐，因為不用細想就乜都有。」這間梁進經常到的茶餐廳自然成為其筆下的重要場景，他說：「茶餐廳發生的事，實在好得 意，好像夥計的制服口袋總是留下很多原子筆痕，枱面的玻璃永遠好多水，搞到杯水郁來郁去。」

【茶餐廳】單看梁進識用叉按扁菠蘿包，令菠蘿皮不會碎散周圍飛，就證明他是超級茶餐廳粉絲。

打冷店 平靚正

除了茶餐廳，另一間位於觀塘鐵皮屋中心的打冷店亦是他的「飛佛」，他說：「觀塘很多打冷店都上樓了，這裏卻保持街邊檔風味，經常和家人來幫襯，一班人食，好 有氣氛。」他更帶我們到打冷店外的公園仔逛。「這裏平日好多小販擺檔，一到盂蘭節又會派米。」夠晒地道特色，雖然有些觀塘人不太喜歡這種等同草根的社區特 色，但梁進卻認為夠親切舒服：「回來觀塘住，環境當然冇美國咁優美，但我一點都不介意，反而認為這裏又親切、又方便！」怪不得阿呢漫畫中曾有「我是觀塘 人」一章呢！

【打冷店】堪稱是梁進與家人的食堂，最鍾意食鵝片、蠔餅，而小圖是漫畫場景，似呢!

鐵皮屋舊得有格調，像這間洋服店的老闆邊吸煙邊拉二胡

在小巷發現一塊木製大棋盤

鐵皮屋 尋舊玩具

除了舊式茶餐廳及傳統打冷店外，梁進對舊事物亦情有獨鍾，閒時亦會遊逛鐵皮屋內一家專賣舊式玩具的小店，他說：「間中可以搵到一些製作巧妙的舊式玩具，令玩的人有很大的發揮空間，現時的玩具所有玩法都有規範，想像空間自然縮細了。」

    * 【鐵皮屋】鐵皮屋的玩具店甚有個性，營業時間浮動不定，像這天我們便摸門釘。

 * 梁進Profile畢業於美國藝術大學，二○○一年回流返港，現時是一位漫畫家兼插畫家。曾出版《豬仔錢罌》、《魚肉燒賣》、《阿呢》、《阿呢茶餐廳》、《阿呢亡命小巴》、《阿呢夏天都要打邊爐》等，作品圍繞香港人生活。

哈佬,o尋日o個集阿呢講到佢o地去o左韓國餐廳食飯,其實我上幾日都係去o左韓國o野,不過同阿呢相反o既係我冇帶相機,唯有用手機影住先啦~ 

其實韓國菜我唔會去o個o的任食漢XX之類o個o的餐廳,反而寧願食得好少少o既起碼食物o既水準會好o的同埋坐得舒服o的     

今次我食呢間係位於銅鑼灣o既韓雅林,特點係 大多數o既待應都係韓國人o黎o既,而好多時仲會見到有韓國人o黎食,証明呢間o野水準都有番咁上下~

同好多韓國餐廳一樣,一坐底就有八小碟kimchi,可能都有o的迎合香港人所以我覺得o的kimchi唔算好辣~ (曾經o係美國食過一開韓國人開o既小店,o的kimchi係辣到爆o既)

自己本身唔太喜好韓式燒烤,因好油煙,不過既然o黎到都燒少少o野啦,今次係燒我最鍾意o既牛月利!! (順帶一提,牛月利隔離係幅送o既沙律,咁樣食牛月利o個陣感覺就唔會咁油利喇)

燒呀~燒...因為薄所以好快熟~

食~食...留意呢度係用金屬筷子o架~

再o黎o既係友人介紹o既泡菜薄餅,一o的都唔辣只有泡菜o既酸味,都幾好味,唔想食飯o既可以試o下

再o黎亦都係友人介紹話超超超超超正o既栗子炆牛肋骨,感覺有o的似中國菜,裡面仲有白蘿白,牛肋骨炆到超"林",真係好得! 係成晚既焦點

你 睇,o的牛肋骨炆林"到用筷子夾就可以張o的肉同骨分開,大大o舊啖啖肉,超好味!! (順帶一提,白蘿白索晒o的汁入晒味都好正!!)

其實o個度仲有好多好o野,不過兩個人真係食唔晒咁多,唯有等下次喇,飯後有甜品送,有雪糕(綠茶或芝麻味)同 薏米水你揀,我揀o左芝麻雪糕,仲有一片仔 西瓜同車厘茄。

我好鍾意食芝麻雪糕(其實綠茶都鍾意),你睇我食得幾開心!!