(special) 牛肉七味~

六月
14

(special) 牛肉七味~

本題目發表於六月 14th, 2009 ( 02:29:17 ) | 並發表到我想講....

如果好鍾意會牛o既話,我會建議你去九龍城o既清真牛肉館,嫌唔順路o既話,隨處揀間比較好少少o既越南餐廳都會食到一個叫牛肉七味o既菜~

故名思意,牛肉七味就係七度以牛肉做o既菜,大致上各間餐廳o既牛肉七味都差唔多,只係有少量特色上o既分別同份量,今日我去食o既就係又一城Rice Paper o既七大牛肉滋味套餐~

可能中國人對七樣菜唔好意頭,所以去過幾間餐廳都會將某幾道菜擺埋一碟上,Rice Paper就分三道菜上,你睇後面o個個人開心到舉晒手o添...哈哈

一般牛肉七味都會有o既碎牛肉粥越南style o既粥比較"傑", 米粒亦唔會煲到爛晒(類似潮洲粥咁) ,加埋越南o既香料真係好好味~

另外有o既就係牛柳卷(牛柳包住牙菜)、牛肉沙律、嫩牛肉餅同金不換牛肉樣樣各有特色好好味,我特登夾晒四樣落隻碟度俾大家睇

而最後一樣就係生牛肉火鍋,火鍋裡面有酸紅/白蘿白,所以湯底係有o的酸酸地o既 (曾經聽過係因為要解o左生牛肉o既肥利)

o的牛肉好靚,除o左牛肉仲有好多粉絲,加上之前個粥,其實都好飽o下

大特寫個menu, 機會大家都可以試o下~

6 個回應到「(special) 牛肉七味~」

薯師奶 [遊客] 發表於: Jun 16th, 2009, 12:44

你好呀!哈哈!
真係好榮幸可以睇到你個網頁呀!
自從最近喺教會度有個中一朋友仔介紹咗你本漫畫比我睇之後,睇"阿呢"就成為我咗同囡囡每晚必有o既親子節目啦!哈哈!仲要扮埋阿呢,阿貓,豬仔把聲,仲有炸蟹鉗.......真係睇得好開心呀!
我囡囡仲成日叫"阿呢!萬歲!"添呀,好攪笑!
我仲差兩本先集齊阿呢o既漫晝,我會努力o架!
你要繼續加油呀!我同囡囡會永遠支持你!

梁進 [會員] 發表於: Jun 16th, 2009, 15:43

薯師奶, 多謝你同囡囡o既支持呀

謝謝您的回覆 [遊客] 發表於: Jun 16th, 2009, 22:25

好開心呀!收到你o既回覆!
我囡囡好興奮呀!
佢話要講佢個英文名比你知,哈哈!話要同你做個friend呀!小朋友嗰然夠直接!哈哈!佢今年五歲,英文名係TOOBY,因為我平時會叫佢做彤B,所以咪取其音,就改咗呢個英文名囉!哈哈!
佢話祝您身體健康,同埋成日都可以畫多啲阿呢阿貓同阿豬喎!哈哈!加油呀!
你的忠實fans薯師奶同彤B 上

梁進 [會員] 發表於: Jun 17th, 2009, 16:29

薯師奶&彤B , Tooby呢個名好得意喎,我好鍾意
我都祝你o地身體健康啦!!

彤B [遊客] 發表於: Jun 19th, 2009, 11:19

早晨呀!哈哈!
我話咗比我囡囡知,你好鍾意佢個英文名,佢好開心呀!仲即刻尖叫:"多謝阿呢哥哥!"哈哈!幫你改咗名添!跟住佢問我你叫咩名,佢搶答:"叫阿呢哥哥嘛,我知呀!"哈哈!佢話呢個名好好聽喎!
跟住佢隨手攞起筆,就晝咗隻攪笑兒童版"阿呢'!
佢叫我要send比你睇喎!哈哈!佢果然係你忠實小fans呀!囡囡仲話要練習多啲,晝靚啲之後送比你!
我哋都有去過"清真牛肉館"度食嘢呀!囡囡最鍾意食"雪菜牛絲麵",老公就最鍾意食"牛肉餅",嗰度啲嘢真係好好味!你去過就近間糖水舖食嘢未呀?
叫做"口甜舌滑"呀,好正呀!
呀!差啲漏咗要問你,嘻!阿呢出咗公仔或者精品未呀?如果有邊度有得買呀?我囡囡話要儲星星買哂咗喎!哈哈!多謝您睇我篇回應呀, 因為我真係太長氣,就講到呢度啦!下次再傾過啦!
今次祝您喜樂平安啦!開開心心過每天!
下次我影咗囡囡畫o既"阿呢",Send比你睇呀!嘻!真係唔長氣啦!我怕阻你時間呀!1234567,多勞多得!哈哈!我都要做家務啦!大家一齊努力工作!畫多啲阿呢呀!哈哈!好好睇呀!