跟Ali通電話時，她的聲音裏有異乎尋常的冷，跟平常爽朗的她大相逕庭。不過說話依然直接，一貫的快人快語。
「你想同我講數？Okay。電話入面講唔清楚，我地約個時間出黎。」
「Ali，唔係我同你講數，係Gus。你地有咩事大家三口六面講清楚。」
「No，唔關佢事。」她一字一句認真地說：「It's between you and me.」
聽見她的話，我感到一陣莫名的心涼。
這次我們約在她工作的報館職員餐廳，而且是午飯時間。她說事情很簡單，三言兩語就能說清楚。
「唔結婚既理由好簡單，因為Gus實會後悔。我唔想佢第日黎怨我。」Ali馬上切入正題，「另外就係，我依家已經後悔緊。我地根本唔應該搞依個婚禮，我一開始就唔應該應承佢。」
「咁開頭你點解要say yes？」我用幾乎是質問的口吻問她。
「因為我鐘意佢。如果我唔係鐘意佢，我當年點解要同你爭？當一個你鐘意既男人向你求婚，你真係好難拒絕佢。你咁都唔明？」
「我又唔係女人，又無俾人proposed過，我點會明？」我點煙。「等等，你好似仲未講，點解你覺得Gus會後悔。」
Ali先是靜了一下，吁口氣然後說：「以前你同佢爭女，he felt hurt，因為佢覺得你唔當佢係兄弟。到左今日，佢咩都知道晒，再見返你之後，Gus就好驚。」她雙眼明晃晃的，「信不信由你，Gus對你唔係無野。佢見番你無耐，即係佢飲大左個次之後，就走黎同我求婚。我知佢驚乜野架。」
我的煙叼在唇上，像被人按了定格一樣凝止所有動作。我的樣子看起來肯定很可笑。
「以前Gus咩都唔知，算你讓我賽。今日到我讓番你，大家公平競爭。」她站起來，「Lunch time完喇，我返去做野先。」
我一直坐到香煙燒至盡頭。熱力透過濾嘴傳到我的指頭，我才清醒過來。
