有些人或者事，就算你不去碰它，它也會得自己找上門來。
Gus打電話給我，約我出來吃飯。我算了一下，距離他出發的日子，應該只剩下一個禮拜。我想，他都要走了，我也不好做得太絕。所以答應他出來見面。
他約我上他家。自從上次為了取消婚禮而奔走後，我已經沒有再去過他的家了。我提議說，不如叫上Ali。他說不。
「唔好喇，費事佢又叫我唔好走。」他無奈地笑。
Gus的家非常整潔。我取笑他，這像酒店的套房。他笑而不語。
「Gus，點解要走？」我問他。
「公司俾機會我，點解唔去？」他側側頭想，「而且我未試過離開，去另外一個城市生活。我成日都有個衝動，好想一走了之。就咁放低晒所有既野，一走了之。」
我無言以對。我到底想說甚麼？我不是要挽留他的。我提醒自己。
「你想放低乜野？」
他轉過頭來，雙眼灼灼有神看著我，「所有野。大學既事、結婚既事、Ali、你。」
「嗯。」我低頭沉吟。
「你唔問我點解要放低你？」
我抬起頭，「吓？」
「其實我一直都唔係好明。我好多謝Ali，如果唔係佢話要cancel個婚禮，我地已經結左婚。有時做錯左好難返轉頭。我同佢未必過唔到人世，你明唔明？」他怔怔地，「咁樣，我就永遠無機會去figure out。」
「Figure out乜野？」我乾笑。
「你唔好扮野喇。你唔好話我知，有條友成日半夜衝上你屋企，仲坐係門口等你幾個鐘，真係無野呀嘛？」Gus說這話的時候，表現得若無其事。
我卻像傻瓜一樣，眼睜睜地看著他的嘴巴在動。
「不過都過左去喇，哈哈。」他把雙手枕在腦後，整個人輕鬆地攤坐在沙發上，「喂，瑞士係講德文、法文同埋意大利文。我淨係大學take過下德文，你話死唔死？」
我不出聲。
「喂，你做咩呀？」Gus驚訝地問。
我不知道，我只知道我開始笑。歇斯底里地笑，被人點了笑穴般地笑。我笑到橫隔膜好痛，止都止不住。笑到後來，眼淚都流出來了。我像小孩子一樣，拿手背去揩。
我現在才知道，原來過去二十六年的生命裏，老天真的待我不薄。可是風水輪流轉，現在我的報應降臨了。
我終於清楚，Gus喜歡我。可是我並沒有好好抓緊機會，我任由他自我指縫間溜走。他要離開這個城市，而我留也留不住。
