由於答應了C.C.七月不寫書，所以，我現正修訂自己過去在博益出版社年代的作品，準備在未來的日子裡重新出版。

我有這個想法，事緣C.C.把一本我N年前的鬼古給她10歲的妹妹與她的同學仔看，C妹興奮地說：「嘩！好鬼好睇啊！還有其他嗎？」這使已取回作品版權好一段日子、卻一直猶疑著該不該出版的我，重燃了很大信心。

很黑色幽默的說，以前有看我博益年代的作品的讀友，如果按照正常成長速度成家立室，他們的子女現在該就是在看《OH！》、《WE》、《THEY 3.0》的一代了！因此，對於已橫越了十多年，在市面上一早已絕版的這一批中古作品，經過歲月的洗禮之後，還能在一個只有10歲的小女孩口中被評為：「嘩！好鬼好睇啊！」而不是「嘩！老鬼土到oY！」我實在感到異常安慰的啦！

始終，時代不同了，我無法衡量到自己過去寫的東西好不好看，甚至用以前看我的讀者的標準也不能作準了。只有現在10+這一代，才能真正斷定這批本來永不超生的作品的再生價值吧？

老友豪哥一向數口精，他說：「你在博益有55本書，就算每個月出一本，在未來5年也可不寫書啊！」他的想法沒不對，但我心中的理想卻不一樣。我不認為只是換個書名、轉個新封面就有值得再出版的價值。總有些事情比這個更加重要的，就譬如，對我來說最大的意義就是-------我必須正視著自己的過去。

從來沒有人知道，對我來說，面對過去是一件多麼難堪的事情。而事實上，我一直也在採取著駝鳥政策，每寫完一本書後，如非必要（例如要寫系列的續集），我絕對不會重看。所以，對我來說，這次我冷靜而嚴肅地回看這些舊作，無疑等於替過去死因不明的自己進行了詳細的驗屍，無論有多恐怖有多醜惡也好，我將它視之為我這世仔面對自己的唯一一次機會了。

把自己曾經的心血再添上更大的心血，那種隆重其事的感覺，原來還是非常壯觀的。

 PS：今年書展，我的簽名會只有一天，最後卻每次來到也要簽書，搞到現場有點兒混亂，真要感謝各位同事們對我的百般容忍。還有，當然是前來支持我的讀者朋友們。我是個很怕人類的人，但大家的友善，讓我開始放鬆不少了。謝謝大家。

對於一個鍾意寫野既人黎講，趕稿既日子固然苦不堪言，但叫佢停落黎一兩個禮拜唔可以寫野，真係唔知有乜好做。

因為應承左C.C.成個7月唔寫野，我唯有日日坐響屋企煲日劇，而佢呢幾日同家人飛左去見白龍王，留低我憨居居咁，無聊到啊！

由於呢個真係悠長假期，所以我終於的起心肝，搞搞我書房部時好時壞既桌上電腦啦。因為成日驚佢隨時釘蓋，裡面儲左五六年既野一次過會冇哂，所以我終於乖乖咁買左個500GB既Hard Disk，一次過將成個電腦既稿啊、成萬張相啊、影片啊咁複製左落去，竟然都係用左40GB咋！其實諗起上黎，既然我早知自己都係電腦白痴，應該早D買啦！。我上次部Notebook就係咁樣突然死亡，我裡面有多好稿件冇留底，救唔番！

我依家開始用緊個500GB Hard Disk 將桌上電腦雜亂無章既資料分類緊，睇下有乜好笑好玩野，繼續響呢度向大家報告下啊！

 ▼下面有圖片，唔知點解要跌落兩層樓先顯示倒既▼

就係LACIE呢個牌子，我響灣仔電腦城買既，格哂價架啦，$720，一勞永逸算係咁

 C.C. SMS話我知，原來見白龍王要晨早6點前去到，要漏夜出發啊！我咪SMS安慰下佢囉

《慾望手冊上的小白兔》

尋日講到我會響書展出第七本『男人的愛』系列《慾望手冊上的小白兔》。但事實上，呢本書根本唔響我計劃之內架！

我五月寫緊《終於，惡魔拯救了天使》既時候，因為係『THEY 3.0』新系列第一集既緣故，可能太緊張啦，寫得真係好唔順，有時一日寫千幾二千字都唔夠，心情壞透既我，咪唯有放縱自己成日同C.C.去食野囉（金牛座既我好少買野，都係食落肚最實際）！我屋企乜雜誌睇完都丟走，只係鍾意儲「飲食男女」，而當我亂咁翻那一疊差唔多有半個人咁高既「飲食男女」，我突然發現左有本無印良品既單行簿夾左響兩本之間（我係會將D稿亂放一通既人），打開本無良印品一睇，成本簿都寫滿左故事大網，簿入面重有一隻CDR，原來係我04年寫到一半既『男人的愛 7 』-----《慾望手冊上的小白兔》。

我回心諗下，其實當時成套『男人的愛』系列都賣得好好，《一個人不止愛一個人》甚至係當年全年度既十大暢銷書，點解我會唔繼續寫落去呢？然後，我終於諗到點解啦。呢本《慾兔》寫到一半，自以為好明白男人、女人、愛情既我，突然說服唔到自己係一個真正既大人，我只不過好似著哂成身西裝扮大人既死o靚仔響度班門弄斧！呢樣野跟年紀完全冇關，只不過我當時既心態令我喪失哂所有寫落去既信心，再加上當時我寫完第六本《派對動物馴情記》之後，隨便寫下玩下既學校愛情輕喜劇《oh！戀上鄰座的你！》又幾受學生仔歡迎，咁我咪自自然然放低左套『男人的愛』系列，呢幾年又馬不停蹄咁寫『oh！戀愛學系』、『WE』、『THEY 3.0』囉！我差一D忘記左，原來我一直響度逃避一D野。

-----係，我逃避緊既，就係我始終唔願意變成一個男人。因為，只要一旦承認自己係一個男人，就必須負起前所未有既作為男人既重擔。

但係，當我突然毫無先兆咁搵番呢本寫到一半既《慾兔》，我當日就同出版社講，今年書展我想出多一本小說。

因為我相信，幾年之後既我，已經比以前更加沉實、更知道自己做緊D乜野，對於點去愛一個女人，對於自身，都有更一步既了解。甚至乎，滿以為永遠都唔會想結婚既我，居然都想嫁出去！原來，我以前唔係唔想結婚，只係搵唔倒一個想結婚既女人。也就正如，我以前唔係唔想去做個男人，只係欠缺一個叫我用一個男人身分企硬出黎既重大理由。但依家，我好清楚自己想去做、同應該做D乜野。所以，呢本書係我自願要去寫既。我就知道，命中註定我要向幾年前既自己作一個交待。

如果話，今次出既三本書之中，我最想得到男男女女、大家支持既，就係呢本《慾望手冊上的小白兔》。。

PS：我搞唔掂圖片管理，總之大家睇到就算數啦=.=

PS2：呢個就係『THEY 3.0』既封面，唔知點樣縮細，大家離遠D睇啦，唔係會近視啊！

PS3：呢個係《烈日當空》既書封面，但顯示唔倒出來？？？大家只好去到書展先睇啦

每年一到書展，例牌都要出書湊湊熱鬧。最瘋顛既年代，係我曾經游走於博益同皇冠兩間出版社時，一個書展竟然出左7本書！但其實，響書展出咁多本書，係自己搵自己笨既事，自己打自己好無謂！再加上近年通脹紙價勁升，書價愈黎愈貴，所以近幾年我都係行精兵制，覺得有出版價值既先至會出，依家係同度時艱既時間，千祈唔好俾人覺得掠水啊！

我知大家去書展既預算有限，所以我特別將今年會出唔同性質既三本小說攤出黎俾大家睇下，俾大家可以按照喜好去揀自己鍾意睇既書。我相信要保持住高透明度，先係今時今日既服務態度吧。

《終於，惡魔拯救了天使》

『THEY 3.0』系列既第一集，係我繼『WE』系列寫既另一套校園愛情小說。如果話『WE』係「我們」身邊發生既古仔，『THEY』就係發生響「他們」身上既古仔啦。呢套新系列，環繞既就係一班壞學生，響環境複雜既學校裡掙扎求存、情感關係更加複雜既愛情故事。

我初步預計『THEY』會出四集就玩完，大家唔駛好似追『WE』咁追足幾個世紀。而我8月一開筆會寫既，就係『THEY』既第二集，所以，大家睇完《終於，惡魔拯救了天使》有乜野諗法，記住話我知，我會參考埋你地既意見先寫落去架！

一定有人問，乜野叫做『THEY 3.0』？因為成套系列寫既係band 3學校既學生嘛！大家明冇？

《烈日當空》

我寫既第一本電影小說。

電影既主題講述一群高中男生友情、愛情同成長既故事。 主題可引述電影公司網頁既一段話：「高中男生之間的友情與義氣是非常重要的，所謂的死黨，是一大群人，吵吵鬧鬧、成群結黨的。在高中生還不了解自己是誰時，我們需要屬於一個群體，由群體來告訴自己我是誰。而當這個群體瓦解時，我們就必須面對自己，思索自己的身份。」

我本來冇諗住接呢個劇本去改成小說，但係出版社既同事睇過試片之後，話我肯定會鍾意呢套戲，我半信半疑咁去睇左，又真係發覺真係好合我既口味，所以，響我寫緊兩本書展小說既同時，亦都堅決要接埋佢黎做。同時，亦都算係我支持香港新導演同一班新演員既一份心意。

最神秘既事係，響香港，電影盡量會安排同小說同步推出，藉以收到宣傳之效。我既《烈日當空》小說依家先出左，電影要幾個月之後先至上映，簡直可算破天荒。所以，大家不妨將佢獨立當係我寫一本小說去睇，亦未嚐不可。

至於我以後會唔會再寫其他電影改篇小說？我諗機會唔大啦。我自己要寫既書都寫極都寫唔完，除非我真係好鬼鍾意套戲、同埋我真係好有衝動去寫啦！

《慾望手冊上的小白兔》

除左校園小說，如果大家重有印象，應該記得我寫過一套六本既『男人的愛』系列（包括《一個人不止愛一個人》、《自由之丘上的春樹》等），而《慾望手冊上的小白兔》就係這個男人愛情系列的第七本啦！

至於，點解要事隔四年後先至出版《慾望》？聽日詳細話俾大家知，因為呢單野簡直係X檔案------你要相信！

PS：好多謝大家對我同C.C.既祝福，我曾經諗好唔好話俾大家知（連我老豆阿媽都未知啊！），而事實證明我真係太過憂慮啦！真係好高興大家當我係老友咁去支持我。我一定會盡力做一個好男人，努力對呢個女人好

我旅行返來香港了囉！

做過幾本旅遊書，我覺得去旅行其實最緊要俾自己放鬆。第一兩次去一個陌生既地方，最好都係跟團，因為你可以好籠統咁認識左果個地方，又唔駛盲中中，並且可測試你下次重想唔想再去。之後，就寧願貴D都用自遊行既方式去（自遊行既價錢，預算係跟團既一半到一倍），因為幾點先醒、幾點去玩、甚至玩都唔去玩都係任由你決定，唔駛晨早7點鐘俾領隊叫醒你，用多D錢去換取更大自由，咁樣先算係真正既遊埠啊！

已經有好幾年冇咁放鬆過，但可能真係太輕鬆啦，居然感到心慌慌，果種感覺好奇怪，我好似失左業咁！諗起上黎，我一直都唔係果種重視事業既人，但係叫我忽然一D野都唔做，我又周身唔自在，我可能真係對自身冇乜安全感？

我答應左我女友C.C.，我成個7月都唔會寫書，只係陪佢去玩，於是我就忍住唔寫囉！雖然手停，但係個腦真係停唔落黎，我已經好興奮咁諗緊接下黎要寫既書。計一計，我手頭上想寫既小說已經排到下年年中！諗下諗下，我又冇咁心慌啦，7月盡情休息下就好！8月先繼續沖廁啦，理鬼得佢！

下次我跟大家講講我書展會出既三本書，有興趣既朋友留意啊。

ps：我同女友C.C.訂左婚囉！我希望努力寫多D書，賺多D錢，可以快快趣趣咁娶佢！

PS2：C.C.令我覺得自己真係一個幸福既男人，所以，希望大家都可以祝福我地啊

用了長達三個月，寫完書展的三本小說後，我終於可以真正去旅遊休息一下了，回想起來，我上一次真正的去旅行，已是六七年前的事了。

自從做了旅遊書後，每次去到外地，都是為了工作。我發覺我根本沒有真正放鬆過，所以，決定不再寫旅遊書後，我有三年沒離開過香港，可想而知，我多害怕做旅遊書的日子。

所以，這次沒有做旅遊書的包袱，整個人真的可以放鬆下來，我這次一去就是9天，所有人都不會找到我啦！

本來想在回港時才寫日記，但一放鬆下來，就很想給寫些什麼了。我相信，我始終是真正喜歡寫作的人吧？

下一篇，我給大家寫寫關於旅行的事，記得繼續看我:>