文章發表於: 十月 2008, 22
報告隊長
A、 我呢排應承左會去出版社搞既一個讀友BBQ聚會，推左個學校邀請既演講。因為，對我黎講，一大班人去BBQ，已經係上個世紀既事，我真係當係同成班FRIEND去玩，心情好鬼輕鬆；學校演講唔同，點講都係工作，就算有車馬費，我都覺得一d都唔好玩，都係無謂勉強自己啦！
B、 近來既出書表排得密麻麻，因為自覺上幾年實在太懶啦！幾個月先寫一本書。大家一定以為我寫書既時間愈耐本書就愈好睇，其實係錯既，因為我多左時間一樣會懶懶閒，睇下碟打下機訓下覺又一日，直到交稿時間前夕先識驚，o個陣時先至會係真正既勤奮啦！所以，實際上，無論俾三個月我、俾半年我，我都係臨尾o個三幾個禮拜先會認認真真咁寫，所以，人賤自知，我限自己一個月時間寫一本，咁咪提高左效率囉！
C、 係啊，一個都唔知算好定壞既消息：原本會響下年新年期出既《WE 8---排行榜外的真命天子（暫名）》，因為節目調動關係，有望可以響今年聖誕出。而本來想出既《Oh 9完結篇》，因為未諗到點寫，又要再押後啦。對於睇左8集等緊大結局既朋友，我係愈黎愈內咎！但請相信我，每個系列既結局篇，等於要我親手決定每個主角既幸福同生死，實在好難落筆架！
D、 係啊，講返個BBQ，名額得15名咁大把，有興趣要快d報名，我已經同出版社既同事們商量好，希望盡量做到男女讀友各半，咁就大家都唔尷尬，我亦都可以放心咁燒我既雞翼啦！
E、 今次報告完畢，下次同大家傾下心事先:]
最近的回應