小時候，媽媽常常帶我食越南嘢。
長大後，就對越南嘢有著一份特別的情結。
雖然泰國嘢很好，但二者擇其中，最後，總是越南嘢以點數勝出。
那點點點數，是媽媽為我加上去的。
每次落校車，我就會問，今日食咩？食咩？係咪去和富食越南嘢？
感謝我的媽媽，在我身邊同學才剛聽說過什麼是壽司時，你已經帶我吃過韓國燒烤、親子丼、越南嘢、泰國嘢、雪園飯店上海嘢﹙唔係369喎﹚，家鄉福建菜，同埋酥皮龍蝦湯。
不過是小學一二年生，當時身邊同學，都唔知咩叫撈檬，仲舉手話我講粗口。
扎肉佢個撈檬吖。
還記得第一次食凍檬，倒到一碗都係，酸到爆。
又試過成日因為個書包撞到枱，結果成條白色短褲都係撈檬味。
唔洗問，越南嘢，最鍾意梗係春卷啦。
細個最大既課題，係點樣可以借啲意唔食包住果塊菜，但又食晒最多既春卷。
春卷，最緊要梗係脆啦。
Pho Tai的春卷，脆口，不腍不散，好吃。
每次吃雞翼，都不知道究竟應該選牛油雞翼還是香茅雞翼好。
鍾意咗鮎川圓，但又覺得檜山光好。同咗阿圓一齊，又會掛住阿光。
次次食緊呢隻雞翼，都會諗，如果叫咗第隻，會唔會更好味呢？
恭介啊恭介。
原來，我響咁細個，已經三歲定八十。
呢間Pho Tai，香茅豬扒做得又腍又好味，又唔似落咗鬆肉粉，香茅味濃，值得一試。至於最出名既生牛肉河，亦都如傳聞中軟滑，走街坊格局，但餐廳質素，價錢唔貴，值得一試。
最可惜，係冇甜品。
細個阿媽帶我食越南嘢，錦上添花既果朵花，就係越南嘢獨有果隻綠色既呢，煙煙韌韌既糕點，橫切面好多層既呢。
好好咬口，最鍾意食。
仲試過痴實咗個膠袋，搞到我食埋啲膠落肚添。
好在口累得切。
﹙Pho Tai 越南牛肉粉專門店，響上環文咸東街49號地下，價錢ok，並非很扮嘢的細細碟fusion嘢，搵日行開中上環，唔想上蘇豪食到咁拘束，可以去Pho Tai試吓。﹚
