在日本看到友人傳來的短訊，說你的書，出版了。

在涉谷街頭，流連忘返的我，竟然因為掛念自己的書，好想立即把它們掂在手心裡，驀然萌生回去的衝動。

讓我想回來的，不是人，而是書。

文字。

我一直以為，量和質之間，有著大家約定俗成的關係。越是專注，越是深愛，但原來，對某些人來說，不一定的。

不一定的。

十五本書，分別切中了我感情裡的不同部分，呈現了十五個不同的我。

是呀，我就是這樣的一個男生。

愛著《一路走來》的我，跟被《原來戀愛2》感動的我，並不衝突，同時存在。

我很慶幸確認了這樣的一個自己。

 ※※※※       ※※※※        ※※※※       ※※※※※※

昨天，我終於回來。

回來後，第一件事，就是記掛著機場的書店關了門沒有，裡面有沒有我兩本新書。

當我在車裡把兩本書拿起，指尖是抖顫的。

連我也不明白，為什麼一口氣出十五本書，對每一本，還是那麼憐愛啊。

《一路走來》的巧妙設計，實在是藝術品。

我心想，嘿，即使裡面是白紙，或者胡亂把大堆亂碼湊在一起，這本書，也一定有人會買吧，型到咁。

這本書，應該是暫時我最喜愛的散文。

因為，那比較接近真實的我。

書背的一段引文是我很喜歡的：「我一直相信，如果人沒有動身挑戰不可能的勇氣與決心，永遠只做你一定做得對、做得好的事，你的勇氣與雙眼裡的閃亮神采，終究是會慢慢消失的。 

因為，當人一旦不再嘗試挑戰一些不可能做到的事，他就停止成長了。」

我一直在努力前行，努力延緩停止成長的方法。 

所以，走到這裡。

《原來戀愛2》嘛，今次則是tiffany blue。

像長方形的tiffany禮物盒，裡面，也是愛情的憑證。

很多女生都說喜歡呢。

我自己也愛不惜手。

我跟一些男生說，如果你還沒錢給她tiffany，用tiffany 紙袋盛著這本書，送給她吧。

p.s再次衷心感謝我的至愛設計大師Henry Ho，你再次讓我驚喜感動，沒有比現在更

完美的呈現方式了。

1. 把自己迫到絕路，然後看看自己潛能，一向是我提昇的方法。
2. 上年五本，今年十五本。
3. 比去年進步兩倍，嘿，我仲唔係今年MIP 與 MVP？
4. NBA總決賽又打完咯~~其實以前真係唔係幾喜歡拜仁。
5. 尤其佢成日懶叻挑戰佐敦果陣。
6. 但佐敦唔響度咁耐，望住佢，佢又係唯一最有佐敦味道既一個球星……
7. 有時都忍唔住懷念，甚至將對佐敦既喜歡，投射咗響呢個咁似佐敦既人身上。
8. 呢種感覺真係複雜。
9. 好似電視劇鍾意咗仇人個仔咁~~
10. 六月尾推出既《一路走來》同《原來戀愛2》呢個星期尾拎去印啦~~
11. 15本書既封面已經睇晒，興奮到呢~~~
12. 好想拎出嚟同大家分享，但又怕冇晒神秘感~~~
13. 其實一星期講一本，都可以講足成四個月啦，哈哈哈~~~
14. 不過呢，有時都係保持神秘好啲既。
15. 最近真係冇咩好戲睇，又冇劇煲。
16. 《變型金剛2》斷估唔會失望啩？
17. 激死我部儲咗幾年無數絕版好歌既i pod突然有日開機咩都冇晒。
18. 冇咯，冇咯。
19. 有咩好儲吖人生，勤勤懇懇，到頭來咪又係咩都冇？
20. 及時行樂最緊要。

本周金句：

「不要以為你能寵壞我，因為我比你所想的，還要壞。」

1. 我至愛既超級設計師Henry Ho 28/5 生日，在此恭祝佢生日快樂~~~
2. 剛收到佢寄比我兩本書既封面，靚到呢……
3. 簡直令人驚嘆~~~~痴線架！點可能諗到咁架！
4. 如果大家覺得《幸福在右邊》或者《原來戀愛》好正，咁呢兩本，就更加不得了。
5. 呀，唔記得講，我crazy到呢，由原訂14本書，改為出15本。
6. 當你未寫好14本，最熱血既做法，係決定出多1本。
7. 咁最後，你應該至少可以完成到14本，甚至真係15本。
8. 哈哈哈。呢種路飛式「升呢」方法，冇食過惡魔果實，體內冇番隻九尾妖狐既強大卓羅，真係未必可以有樣學樣。
9. 係喎，果15本書呢，為免大家到時書展搵唔齊，我決定6月尾先出2本！！
10. 係咪好想知道書名呢？
11. 聽住啦，一本呢，叫做《一路走來》。
12. 另一本，叫做《男人不夠gentleman‧女人不夠 feminine》。
13. 嘿嘿嘿，係咪好正先？
14. 我睇住呢兩本書既封面，忍不住哇一聲嗌咗出嚟。
15. 我阿媽睇完，一邊行開，一邊講咗句。
16. 「人既嘢，天生既。有啲人有設計天份，有啲人冇……有定冇，真係一眼就睇得出……你睇，勁過其他人幾多？」
17. 簡直令我熱血沸騰。
18. 最近又煲番日劇。
19. 越忙越鍾意搞呢搞路。
20. 睇咗《學校沒有教的事》、《成為王子的正確方法》、《前男友》、《金錢小子》、《變身特派員》一大堆。
21. 幾好睇喎又，尤其《學校沒有教的事》。
22. 比起果套垃圾《18禁不禁》，真係高章好多好多。
23. 快啲出太陽啦，好想晒黑啲呀我。

1. 上年今日，我身處日本，忙於為《幸福在右邊》努力奮鬥。
2. 唔知出到嚟會點，唔知點解要做，但一股勇氣，令我不屈地迎向各種挑戰，航向未知既領域。
3. 咁又一年。
4. 今年，我會有另一項令我興奮顫慄既新搞作。
5. 呢件事，令我呢排興奮到瞓唔著。
6. 向前，又踏出一步。
7. 希望大家都會支持我呢個瘋狂既決定。
8. 因為，真係好勁架。
9. 匯報一下進度先，依家小說第二本已經寫咗三分一啦。
10. 暫訂六月先出兩本，書展再出埋果十一二本。
11. 費事大家睇唔切呀。
12. 不過如果大家到時好似玩treasure hunt 咁，響會場四圍搵，儲齊我果十幾本書，又真係幾好玩……
13. 至少係書展創舉呀！
14. 嘿嘿。我最鍾意搞埋呢啲奇怪嘢。
15. 好多人問我出十幾本書係咪玩嘢。
16. 我話，如果我安安分分出一本，先至係玩嘢。
17. 有啲人，量上昇，質素就下降。
18. 但我呢隻，量越上昇，質素就越上昇。
19. 因為我係撒雅人種族，同地球人構造係唔同架。
20. 所以，唔好用你地既標準嚟評定我。
21. 更何況，有啲人，唔好講質咁虛無縹渺，連出到十幾本書既量都未夠呀。
22. 呀，近排有個開心消息，《原來戀愛》長期高踞三聯同大眾書局暢銷書榜呀！
23. 呵呵，終於算叫做暢銷書作家咯……﹙算卦？﹚
24. 一個文學作者同時身兼暢銷書作家身分，呢份雙重銜頭，特別有意義。
25. 多謝大家支持呀。衷心感謝所有鍾意我文字，同埋鍾意《原來戀愛》既朋友。
26. 仲有，都多謝一下鍾意粉紅色既「粉紅之友」會各位潛伏會員啦！
27. 哈哈哈！
28. 下一本書會咩色好呢……
29. 係喎，提提大家，依家《成報》每日都會有我既飲食文章，想睇我點寫食，就買份《成報》睇吓啦。
30. 篇欄目，叫做《什麼口感》，嘿嘿嘿~~~~

1. 靜靜雞話你知，我已經寫完一本小說咯～～～～～
2. 不過唔可以開心住，因為今年書展我打算一次過出兩本。
3. 所以只算跑咗一半路程，仲有一半。
4. 不過嚟緊忙到爆，其他書郁都未郁。
5. 所以都未敢樂觀。
6. 不過，我呢啲爆炸力之鬼，到時又真係船到橋頭自然直既。
7. 本小說我好鍾意呀，又係唔同風格，能夠變出一個新既自己，係一件好開心既事。
8. 掘吓掘吓，咦，又有寶藏。
9. 呢度係礦泉水，呢度…咦？石油喎！
10. 我打算的起心肝寫呢個生平唯一長篇鉅製，預計至少十集八集。
11. 今年嘔住兩本先……
12. 我諗可能三四本一章啦，三四章，每章獨立但又互相牽連，幾章夾埋，我既魅惑神秘世界就會成形咯。
13. 我諗我恩師既長篇癖好，我其實都有。
14. 呀，講起恩師，董啟章佢贏咗今年藝術家年獎，好戥佢開心呀～～～
15. 佢絕對應得。
16. 呢排電台真係超級忙，勁想去旅行，但睇嚟都唔知幾時先至見到浮台。
17. 晚晚五六點清晨先瞓。死唔死。
18. 好憎呢種天氣。快啲ｓｋｉｐ吖唔該。
19. 《正義之味方》呢套日劇比想像中好睇，志田未來真係幾好戲，又唔浮誇，不過《ｒｏｏｍ　ｏｆ　ｋｉｎｇ》就真係有少少出事。
20. 仲未諗到小說既書名，呢啲浩翰宏大既史詩式長篇，個名真係唔易諗架。
21. 凌晨四點都仲ｕｐｄａｔｅ個ｂｌｏｇ，咪話我唔錫你地啦。
22. 難得本少爺今晚眼瞓……
23. 講講吓，都係時間停頓呢種異能最啱我。